Tuesday, October 5, 2010

بوست ثقافة


حقوق التسمية محفوظة لدكتورة ستيتة

وطالما قالت اسمه بوست ثقافة يبقى نسميه بوست ثقافة 
وإليكم الأنباء بالتفصيل 

أقصد البوست أنباء ايه اللي مستنينها :)

شايفاكي شايفاكي على فكرة عمالة تقولي هي مالها قلبت عامية ليه 
أقولك أولا براحتي :)
ثانيا لأن الموضوع أصلا عن اللغة العربية 
ومش عايزة أعمل زي اللي "فسر الماءَ بعد الجهد بالماءِ"

حلو الكلام؟؟
قولوا ... كلام جميل 


بقى يا جماعة في ناس كتير مننا من واحنا صغننين حلوين كده 13 -14 سنة 
أخدنا في المدرسة درس لطيف ظريف معرفش بقى في سنة كام دلوقتي اسمه "العدد

الدرس دا كان ثقيل على قلب الجميع حتى اللي بيحبوا اللغة العربية 
ليه بقى؟؟ .. قلتوا لي ليه 
لأنه كان بيلخبط جدا لأي حد مش بيستخدمه في حياته اليومية 
ايه اللي 1 و2 العدد يوافق المعدود ، و 3-9 يخالف والعشرة لو مركبة لها حال ولو مفردة لها حال 
ولسه بقى الأعداد المركبة وليلة يا عمدة [على رأي واحدة معرفهاش بس واضح إنها مشهورة أوي :)]
فاليوم جئتكم بالخبر اليقين من عند مدام جهينة 
ايه بقى الخبر 
الخبر يا بلوجراية يا كرام إن الموضوع أبسط من كدا بكتير جدا 
ولا يوافق ولا يخالف ولا مركب ولا مش عارف ايه 
الحكاية بسيطة خالص 

دلوقتي الأصل في الكلام ايه ؟ المذكر ولا المؤنث؟
(مع الاعتذار لجمعية المرأة المتوحشة) بس الأصل في الكلام طبعا المذكر 
يعني لما بنيجي نكتب مثلا أسئلة امتحان بيكون رأس السؤال ( اذكر - اكتب - اجب .... وهكذا) رغم إن أكيد في بنات هتمتحن في الليلة دي بس مش بنقول (اذكري - واكتبي -..... ) 
حتى في الآيات أو في الأحاديث بيكون الخطاب لعموم المسلمين أو حتى لعموم الناس بصيغة المذكر 

إذن اتفقنا على إن الأصل هي صيغة المذكر 
(لأننا نخاطب بها العموم مذكر ومؤنث) ... مشاركينهم حتى في صيغة المذكر مش سايبنها لهم لوحدهم :)
والفرع هو المؤنث لأننا نخاطب به المؤنث فقط ..

لما نيجي نعد نحط الأصل مع الأصل والفرع مع الفرع 
يعني ايه 
يعني نشوف الأصل في العدد ايه ؟؟
احنا بنقول العدد 3 ازاي ؟ (ثلاثة) يبقى أصل العدد (ثلاثة ) مش (ثلاث
يبقى نشوف احنا بننطق العدد ازاي ويبقى هو دا أصل العدد وغير كده يبقى فرع

نحط الأصل مع الأصل 
فنقول : ثلاثة رجال - ثلاثة كتب - ثلاثة كراسي 
ونضع الفرع مع الفرع 
الفرع في الكلام هو : المؤنث 
والفرع في العدد هو على غير أصله
فنقول : ثلاث كراسات - ثلاث قصص - ثلاث طالبات 

هتيجي نفس الأمورة اللي أنا عارفاها اللي قالت لي فوق انتي قلبتي عامية ليه تقول لي 
قصص دي مذكر 
أروح منادية لفاتيما على طول أستلف منها الفلكة عشان هي اللي بتنادي جابر مش أنا 
وأقول لها افتحي ودانك يا أمورة عشان الضرب ممنوع في وزارة الداخلية 
احنا بنبص على المفرد 
بنبص على ايه يا حلوة؟؟؟ على المفرد 
شاطرة ارجعي مكانك 

خدي الفلكة يا فاتيما 
نرجع لموضوعنا 
خلاص عرفنا نعمل ايه في الأعداد من 3 - 9 
ونلاقي في الآية الكريمة- في سورة القمر- مثال على ما قلناه :

{سَخَّرَهَا عَلَيْهِمْ سَبْعَ لَيَالٍ وَثَمَانِيَةَ أَيَّامٍ حُسُوماً فَتَرَى الْقَوْمَ فِيهَا صَرْعَى كَأَنَّهُمْ أَعْجَازُ نَخْلٍ خَاوِيَةٍ(7)}

ليالي : مفردها ليلة يعني مؤنث فجاء معها الفرع (سبع) 
وأيام : مفردها يوم مذكر فجاء معها العدد على أصله (ثمانية) 

طيب والأعداد من 11- 19 
المتركبة دي وهتقرفنا بقى 
أقول لكم ولا تقدر ولا تستجري 
هنطبق عليها نفس القاعدة 

الأعداد دي عبارة عن : الأعداد من 3-9 وجنبها 10 
يعني ثلاثة عشر - أربع عشرة - تسعة عشر
في ناس نبيهة ما شاء الله لاحظت أهو حاجة مهمة 
إن التاء المربوطة لما تيجي في العدد نشيلها من العشرة ولما ما تجيش في العدد نحطها في العشرة 
يعني 
عندنا 13 رجل 
عايزين نقول إنهم عندنا 
نقول ازاي ؟؟ 
رجل دا مذكر 
يبقى يأتي معه العدد على أصله اللي هو ايه ؟؟
شاطرين 
(ثلاثة)
زي ما انتم شايفين أهو (ثلاثة ) فيها تاء مربوطة 
يبقى نشيلها من العشرة 
عمر ما جزئي العدد هيكون فيهما الاثنين تاء مربوطة هما الاثنين مع بعضهما 
نحط التاء المربوطة في جزء نشيلها من التاني 
فنقول : عندنا ثلاثة عشر رجلا 
ورجلا ليه (نفس الفذلوكة اللي كل شوية تسأل) 
عشان تمييز الأعداد دي مفرد منصوب ودا بوست تاني لوحده كمان 3 سنين كده إن شاء الله 
لما أقعد القعدة دي تاني :) 

ومثال من القرآن في سورة المدثر 
{ عليها تسعة عشر  (31) }
أي عليها تسعة عشر مَلَكًا
من الملائكة يعني ، مش من الملوك 
نلاقي هنا إن التمييز ( اللي هو المعدود) مذكر 
فجاء العدد على أصله (تسعة) وبما إنه فيه تاء مربوطة فحذفناها من العشرة 
فصارت : تسعة عشر 
(تمييز مفرد منصوب برضه يا فذاليكو )

فهمنا يا حلوين 
والله أنا انفع مُدرسة 
بس يكونوا الطلبة زيكم كده حلوين وهاديين وبيسمعوا الكلام 
خدوا يلا بونبون وحاجات حلوة



عايزة التعليقات بقى تحل لي الواجب 
كل تعليق يكتب لي جملتين 
افتحوا الكراسات واكتبوا الواجب : بوست 5 / 10 / 2010
أكتب جملتين مفيدتين 
على أن تكتب في الأولى عددا مفردا ( من 3- 9 يعني ) 
وفي الثانية عددا مركبا ( من 11-19 ) 
وضع التمييز المناسب لكل منهما 

واجب سهل وجميل 
وهديكم عليه درجات ونجوم :)
 وأي حد عنده أي أسئلة يكتبها لي وأنا أجاوبها إن شاء الله 
حد ما فهمش حاجة ؟؟؟
طيب حد فهم حاجة ؟
جرس الفسحة ضرب 
هيييييييييه
----------------------------------------------
إهداء لأستاذي د.عادل سرور جزاه الله خيرا

11 comments:

ستيتة said...

ثلاثة عشر - أربعة عشرة - تسعة عشر
مش اربعة عشر يا ميس؟
علشان اربعة فيها تاء مربوطة ولا انا فهمت غلط؟

الواجب
أقالوا ثلاثة رجال شرفاء وأبقوا على مليون فاسد

عندي خمس عقد متتالية متتابعة على من يستطيع حلهم التقدم بطلب للسيد البدوي المبتسم دائما وأبدا

البوست الثقافي فجر عندي ثلاث عشرة ذكرى عن استاذ علي خاطر استاذي القديم ربنا يكرمه

يالهويييييييييييييييي

يــوم جــديد said...
This comment has been removed by the author.
أندروميدا said...

لغتنا العربية ... يسر لا عسر ... كما قال طه حسين .

درس جميل ... وشرح اجمل

اما بالنسبة للواجب .... فانا ما بعرفش اكتب اساسا :)

تحياتي

بالمناسبة ... لقد تركت تعليقا علي البوست السابق

يــوم جــديد said...

لأ طبعا فهمتي صح الصح
شطورة يا روح قلب الميس إنك أخدتي بالك
غلطة كيبوردية فقط وتم إصلاحها يا فندم

الواجب دا يودي في داهية بس يلا هي جت على دي

والسيد البدوي سيظل مبتمسا دائما وأبدا ما تتعبيش نفسك مفيش فايدة

وأنا أعمل لك ايه حد قال لك تسميه بوست ثقافي ( على نفسها جنت براقش)

الواجب
1- صح
2- صح
3- صح
10/10 يا قمر
ونجمة*


أستاذ علي خاطر دا موجه أو رئيس قسم اللغة العربية في جنى دان يا ترى هو اللي تقصديه ؟؟

يــوم جــديد said...

أندروميدا

رددت على تعليقك في التدوينة السابقة

لكن هذا الكلام لا ينفع هنا
نحن مدونة ديكتاتورية
الحضور بالواجب
وإلا ........
سأضطر لاستخدام اللائحة العقابية

أين الواجب ؟؟؟

تامر علي said...

أنا هستنصح زي ما كنت بعمل في المدرسة :)

في الأولى عددا مفردا ( من 3- 9 يعني )

يَخۡلُقُكُمۡ فِي بُطُونِ أُمَّهَاتِكُمۡ خَلۡقًا مِن بَعۡدِ خَلۡقٍ فِي ظُلُمَاتٍ ثَلَاثٍ

وفي الثانية عددا مركبا ( من 11-19 )
وضع التمييز المناسب لكل منهما

إِذْ قَالَ يُوسُفُ لِأَبِيهِ يَا أَبَتِ إِنِّي رَأَيْتُ أَحَدَ عَشَرَ كَوْكَبًا وَالشَّمْسَ وَالْقَمَرَ رَأَيْتُهُمْ لِي سَاجِدِينَ

أصل أكيد المثال اللي في القرآن مش هيكون غلط يعني :)))

ولما الأستاذ يسألني بعدما يقفس اللعبة اني اجيب مثال تاني مش في القرآن اكون محضرله بيت شعر
تغرب عن الاوطان في طلب العلى
وسافر ففي الاسفار خمس فائد


ولقد شربت ثمانيا وثمانيا
وثمانَِ عشرة واثنتين وأربعا

بعد كده يكون زهق مني وهو المطلوب اثباته :)))

والله بجد اسلوب جميل ورشيق في عرض المعلومة وارجو الاستمرار واطالب بالمزيد والمزيد ولانكتفي بدرس أو درسين أو ثلاثة دروس ولا حتى تسعة عشر درساً :))))

تحياتي

فاتيما said...

طب سؤال يطرح نفسيته دلوقتى
هوه اللى هيجيب الفلكة
ينفع ينضرب بيها
؟!!!!!!؟؟


أصلى مش عاملة الواجب


و بعدين هوه
ف كل حتة
ضرب ضرب
انا عاوزة شتيمة


انا مش زعلانة منك
يا حبيبتى
و لا اقدر ازعل ابدا
ورديت ع الميل بتاعك
و لا موصلشى ؟!!

البلوجر مستنصد المدونة
بتاعتى
معلش
الفلكة مش نافعة معاه
متزعليش

حلو الدرس قوى
هوه صحيح انا سرحت ف نصه
بس رجعت ركزت

و هقراه تانى على رواقة
تنفعى مدرسة؟

تنفعى و نص وتلتربع

انتى وحشتينى
و يا رب تكونى احسن و اروق دلوقتى
بوسات و حضونات
و تهربات من الواجبات
و تهربات كمان من الفلكات

يــوم جــديد said...

أ.تامر علي

أيوة عارفاه أنا الاستنصاح دا كنت بعمله لغاية ما الدكتور استنصح هو كمان وزود (من إنشائك)فبقى ما ينفعش أجيب لا آية ولا حديث ولا بيت شعر إلا لو كنت أنا اللي مألفاه :)

الواجب طبعا مقدرش أتكلم فيه نص كلمة
50 / 50
تفرقة عنصرية بقى
ربنا يكرم حضرتك والله مفيش أسلوب ولا حاجة وحضرتك تأمر بس بعنوان الدرس اللي عايزه وأنا أكتبه على طول إن شاء الله

أنا كان هدفي الأساسي من البوست دا حاجة واحدة إن كل ما حد ييجي يكتب عدد ويفتكر الطريقة السهلة دي دكتور عادل سرور ربنا يكرمه ياخد أجر
ويظل أجره إن شاء الله مش في اللي علّمهم بس لا في اللي وصلوا اللي اتعلموه منه

يــوم جــديد said...

طب سؤال يطرح نفسيته دلوقتى
هوه اللى هيجيب الفلكة
ينفع ينضرب بيها
؟!!!!!!؟؟
------------------------------
لأ طبعا طيعا طبعا يعني
3 طبعا للتوكيد
------------------------
أصلى مش عاملة الواجب


و بعدين هوه
ف كل حتة
ضرب ضرب
انا عاوزة شتيمة
-----------------------------------
أنا ضربت أنا ولا اتكلمت ؟؟
مش مشكلة الواجب نديكي استثناء مع وعد بإحضار الواجب عندما تسنح الظروف :)

انا مش زعلانة منك
يا حبيبتى
و لا اقدر ازعل ابدا
ورديت ع الميل بتاعك
و لا موصلشى ؟!!
--------------------------------
لا موصلشيييييي
أنا هعيط من الياهو ميل بتاع ستيتة والجي ميل بتاعك ، هعيط ، أنا بعيط أهو خلاص
شوفي حتى أنا كاتبة لك ايه في بوست (العقدة ... اللي هو قبل اللي فات) هتعرفي أنا بنادي عليكي من كام سنة :)
----------------------------
بوسات و حضونات
و تهربات من الواجبات
و تهربات كمان من الفلكات

:*)

د. ياسر عمر عبد الفتاح said...

عمري ما فهمت الدرس ده
أنا أصلاً طول عمري ضعيف في العربي

بس الحمد لله لساني مظبوط
يعني حتى لما أكتب قصيدة
بكتبها صح كلها

بس معرفش أقول منصوبة ليه ولا مرفوعة ليه
هيه بتطلع صح لوحدها

وطبعاً مش هحل الواجب
مع إني فهمت الدرس
بس علشان أنا طول عمري مبحبش الواجبات ,, عقدة طفولية يعني

Ahmad Hossny said...

أول مرة أفهمها

(^_^)

شكراً
أحمد حسني


Qasaqis.blogspot.com

لقطات

يقولون : ثلاثة لا تعود : زمن يمضي، وسهم يرمى، وكلمة تقال ولعل تلك الأخيرة من أكثر ما يؤثر فيَّ ليس فقط لأنها لا تعود لكن أيضًا لأنها تبقى ...