Friday, September 17, 2010

وحشتني



بجد بجد وحشتني 
صحيح إنت ماشي من كم يوم 
لكن وحشتني 
ليه مشيت بسرعة كده ؟
لا لحقت أشبع منك ولا لحقت أتهنى بك 
فراقك صعب أوي 
يوجع أوي ،
أحلى أيامي بتكون معاك
وحشني تكون موجود 
بفرح لما بعرف إنك جاي
وبحزن جدا لما بتمشي كده وتسيبني 
ليه ما تكون موجود دايما 
في وجودك بحس بمشاعر كتير 
مشاعر عمرها ما تحقق غير في وجودك بس 
في وجودك بحب الكون وبشوف الدنيا ممكن تتعاش 
بشوف الناس طيبين 
لما بتكون هنا  الدنيا بتكون غير الدنيا
معاك بعيش دنيا تانية ماعشتها 
وحشتني 
وحشتني أوي يا رمضان 
صحيح بعدك بيكون العيد 
لكن بشوفك انت العيد الحقيقي 
الناس بتتغير للأحسن 
بتطلع من جوا الناس حاجات يمكن كانوا مش عارفين إنها جواهم 
الوجوه مبتسمة والسكينة والأمان في الهوا اللي بتننفسه 
وحشتني أوي يا رمضان 
وحشتني لمة الناس في المساجد 
سباقهم عشان يرضوا ربهم 
الأخلاق العالية والتسامح والكرم 
الهدوء والطمأنينة 
كل الناس اللي بعرفهم في رمضان 
الوجوه اللي كل يوم بدور عليها في المسجد وأشوفها موجودة ولا لأ 
من غير ما أعرفهم أو يعرفوني 
كل رمضان كان له معايا ذكرى جميلة 
ومختلفة عن اللي قبله 
فراقك سنة كاملة بيطول أوي
وبعد سنة بتيجي أخف ضيف مش بنحس به من كتر ما بيمر بسرعة 
النهاردة بدأ 
وبكرة ماشي 
من غير ما نحس 
يارب تقبل منا رمضان وارض عنا

12 comments:

richardCatheart said...

ازيك يا احلى الايام الجديده

والله انت كمان وحشتينا جدا مش بس رمضان

ربنا يديم عليكى طمئنينه القلب فى رمضان على طول طول ايام السنه

ويتقبل منك خير عملك الصالح يارب

ياريت ماتكونيش زعلانه منى علشان ايام ما كنت نزله اسكندريه ظروفى ماكانتش ماشيه والله انا كان يحصلى الشرف لو قابلتك

يارب تكونى بخير ديما

richardCatheart said...

اشطه احتتتتتتتتتتتتتتتتتتتلال
الله اول تعليق

richardCatheart said...

اضرب التالت وخد الرابع هديه

احتلالالالالالالالالالالالالالالالالالالالالالالالالالالالالالال

درجن درجن درجن درجن درجن

ستيتة said...

كلامك حقيقي وطالع من معاميكك ولذلك وصل لمعاميكي
تقبل الله منا ومنك رمضان وتجاوز عنا برحمته وجوده
بحبك

خواطر شابة said...

عزيزتي والله العظيم من اول جملة عرفتك تتكلمين عن رمضان وبقيت عيني تبحث بين السطور الى ان وجدت تأكيدا لحدسي
فعلا عزيزتي كان كالطيف مر بسرعة افتقدنا جوه الروحاني دعائنا الى الله ان يبلغنا القادم ان شاء الله
دمت بكل الود عزيزتي

يــوم جــديد said...

رشروشة :)
منورة البلوج سبوت والبلوجات المجاورة
زعل ايه يا طيبة اللي هزعله منك دا كلام برضه
لأ طبعا ولا خطر على بالي
حد يزعل من ريتشارده برضك :)

احتلي يا حبيبتي احتلي
يعني ان مكنتيش تحتلي مكنة أختك هتحتلي مكنة مين :)
انتي تضربي تالت ورابع وخامس ولا حد هيفتح بقه
والعرض ساري حتى نفاذ زراير الكيبورد

يــوم جــديد said...

ستوتي
آمين يارب يا ستوت
منا ومنكم يا حبيبتي
طمنتيني على سلامة معاميكي :)

يــوم جــديد said...

نوجااا
أحبك انتي وانت كاشفاني من أول سطر كده
معرفتش أعمل تمويه يعني وتكتشفي المفاجعة في آخر الفيلم .. قصدي البوست
تقبل الله منا ومنك يا غالية
وكل عام وأنت بألف خير

موناليزا said...

من أول سطرين حسيت أنك بتتكلمى عن رمضان:)
أصل ده نفس شعورى

اللهم أعده علينا أعوام عديدة وتقبله منا يا ارحم الراحمين

Anonymous said...

اللهم بلغنا رمضان يا رب :)

كلها 11 شهر ويجي

تحياتي

يــوم جــديد said...

موناليزا
دا أنا مفقوسة أوي بقى :)

آمين يا حبيبتي ربنا يتقبل منا ويقبلنا

يــوم جــديد said...

مروة
على رأيك
11 شهر بسسسس
ربنا يتقبل منا اللي فات ويبلغنا الجاي في رضا منه وطاعة منا

لقطات

يقولون : ثلاثة لا تعود : زمن يمضي، وسهم يرمى، وكلمة تقال ولعل تلك الأخيرة من أكثر ما يؤثر فيَّ ليس فقط لأنها لا تعود لكن أيضًا لأنها تبقى ...